Administrata Tatimore ka filluar pagesat e tatimit të mbipaguar për qytetarët që kanë plotësuar deklaratën vjetore të të ardhurave, të njohur si DIVA, dhe që në bilancin e tyre rezulton një tepricë në tatimin e paguar. Deri më tani janë 3091 qytetarë përfitues dhe vlera totale e tatimit të rimbursuar arrin në rreth 53 milionë lekë. Të dhënat i ka bërë publike drejtoria e përgjithshme e tatimeve, e cila e konsideron këtë mekanizëm si një lehtësi fiskale që vjen për herë të parë përmes deklarimit të DIVA 2025, duke krijuar mundësi reale për përfitim nga deklarimi korrekt i të ardhurave. Të gjithë ata që e kanë dorëzuar deklaratën vjetore të të ardhurave brenda afatit 31 mars të këtij viti, kanë ende mundësinë të dorëzojnë kërkesën për t’u rimbursuar për tatimin e mbipaguar. Kërkesa për rimbursim dorëzohet në sistemin e-filling, ku fillimisht do të duhet të plotësohen detajet e bankës. Në llogarinë personale në këtë sistem, tek “profili im” do të duhet të shtohen të dhënat e llogarisë bankare duke përzgjedhur bankën e nivelit të dytë dhe të dhënat e sakta të IBAN.