Pesë muajve të anormalitetit parlamentar u erdhi fundi me një marrëveshje të mbërritur mes Partisë Socailiste dhe Rithemelimit, e cila në fokus ka ngritjen e dy komisioneve hetimore për kontratat konçesionare në shëndetësi dhe sistemin TIMS. Krahas komisioneve, një tjetër dakordësi defaktorizon peshën e grupimit të Lulzim Bashës në Parlament. Palët ranë dakord që brenda komisionit të ligjeve të krijohet një grup pune për të dialoguar ato ligje që kërkojnë 84 vota, një prej të cilave është edhe reforma zgjedhore. Marrëveshja e arritur në konferencën e kryetarëve vjen pas ndërhyrjes të faktorit ndërkombëtar. Selitë diplomatike të Uashingtonit e Brukselit në Tiranë kërkuan njëzëri kthimin e parlamentit në funksionalitet duke mbajtur parasysh se Kuvendi është zemra e demokracisë, ndaj dialogu politik është esencial.