Kandidati republikan për president të Shteteve të Bashkuara të Amerikës, Donald Trump, i është kthyer aktiviteteve të fushatës zgjedhore për herë të parë që prej një përpjekjeje të dytë për vrasjen e tij. Trump u mburr një ditë më parë duke thënë se “vetëm presidentëve të rëndësishëm iu bëhet atentat”, ndërsa ka përshëndetur kundërshtaren e tij, kandidaten demokrate Kamala Harris, për kujdesin e treguar përmes një telefonate. Ish-presidenti amerikan ka folur në një tubim para mbështetësve të zjarrtë të tij në Flint, një qytet industrial që dikur ishte qendër e industrisë automobilistike amerikane në qytetin e luhatshëm të Miçiganit, para se fabrikat të mbylleshin për shkak të konkurrencës së jashtme. Trump është munduar të lidhë atë që Byroja Federale amerikane e Hetimeve e ka cilësuar si përpjekje për vrasjen e tij të dielën, në fushën e tij të golfit në Florida, me zotimin e tij për të vendosur tarifa të larta ndaj importit të automjeteve nga Meksika dhe nga Kina. “Dhe pastaj habiteni pse sulmohem me armë... E dini që vetëm presidentëve të rëndësishëm iu bëhet atentat”, u shpreh ai. Kandidati republikan ka thënë se njeriu që dyshohet se u përpoq ta vriste atë ishte ndjekës i asaj që ai e ka quajtur retorikë e presidentit Joe Biden dhe e Harrisit që ngulmon se Trump përbën rrezik për demokracinë amerikane. Rivalja e Trumpit në zgjedhje, zëvendëspresidentja aktuale amerikane, Kamala Harris, e cila bëri fushatë në një shtet tjetër të pavendosur, Pensilvani, tha të martën se kishte kontaktuar me ish-presidentin pas sulmit të dështuar. “Bisedova me të për të parë se si është. Dhe, i thashë atij atë që e kam thënë publikisht – nuk ka vend për dhunë politike në vendin tonë”, u shpreh Harris. Shtëpia e Bardhë e ka përshkruar bisedën Harris-Trump si “të përzemërt dhe të shkurtër”.