Në kulmin e Luftës së Ftohtë, në vitet ’60, analistët e CIA-s zbuluan një mjet misterioz që po ndërtohej në brigjet e Kaspikut, në Rusinë sovjetike. Ai që fillimisht u quajt “Përbindëshi i Detit Kaspik” më vonë u kuptua se ishte një ekranoplan, një anije ushtarake që kapërcen valët me shpejtësinë e avionëve luftarakë. Dekada pas rënies së Bashkimit Sovjetik dhe projektit të atëhershëm të ekranoplanit, fotografi nga Kina sugjerojnë se Pekini tani mund të jetë duke ndërtuar diçka të ngjashme në Detin Bohai. Anija është quajtur përsëri “Përbindëshi i Detit Bohai”. Eksperti i aviacionit ushtarak, Justin Bronk, thotë për Radion Evropa e Lirë se ndërtimi i anijes eksperimentale nga Kina nxjerr në pah gatishmërinë e Pekinit për të provuar pothuajse gjithçka në kërkim të përparësive taktike ndaj rivalëve dhe armiqve të vet. “Kina është e njohur për vendosmërinë e saj për të financuar dhe për të testuar një mori zgjidhjesh të ndryshme teknike dhe teknologjike për problemet ushtarake”, thotë Bronk duke shtuar se kinezët po provojnë edhe dizajnet me shanse të vogla për sukses.