Luvri u rihap të mërkurën në mëngjes për vizitorët edhe pse Franca mbetet e tronditur nga një prej vjedhjeve të profilit më të lartë në kujtesën e gjallë vetëm disa ditë më parë në muzeun e famshëm. Grabitja e së dielës në mëngjes u zhvillua vetëm 250 metra larg nga Mona Lisa dhe ka shkaktuar një debat kombëtar, me disa zyrtarë që e krahasojnë tronditjen me djegien e katedrales së Notre-Damit në vitin 2019. Qindra njerëz qëndruan në radhë jashtë ndërsa barrierat u hoqën. Megjithatë, vendi i grabitjes, salla Apollon e veshur me xhevahire, mbeti e mbyllur. Autoritetet thonë se banda e grabitësve qëndroi më pak se katër minuta brenda Luvrit. Duke përdorur një vinc të ngritur drejt fasadës me pamje nga Sena, hajdutët hapën me forcë një dritare, thyen dy vitrina dhe u larguan me motoçikleta, në qendër të Parisit. "Kemi dështuar", tha Ministri i Drejtësisë Gérald Darmanin. Në gravitje u vodhën tetë objekte ndër të cilët: një diademë safiri, një gjerdan dhe një vath i vetëm nga një set i lidhur me mbretëreshat e shekullit të 19-të Marie-Amélie dhe Hortense; një gjerdan smeraldi dhe vathë të Perandoreshës Marie-Louise, gruaja e dytë e Napoleon Bonapartit; diadema me diamante e Perandoreshës Eugénie, etj. Një objekt tjetër, kurora perandorake e Perandoreshës Eugénie me smeralde dhe me më shumë se 1,300 diamante, u gjet më vonë jashtë muzeut, e dëmtuar, por e rikuperueshme.