Prokuroria e Posaçme Kundër Korrupsionit dhe Krimit të Organizuar këtë të enjte ka marrë vendimin që të regjistrojë procedim penal për ish ministrin Fatmir Mediu, për cështjen e Gërdecit. Ky procedim penal sipas SPAK, është regjistruar për veprat penale, “Shpërdorim i detyrës”, kryer në bashkëpunim, si dhe “shpërdorim i detyrës” në bashkëpunim me subjekt ushtarak, në kuadër komandues. Gjykata e Posaçme e Apelit revokoi vendimin e vitit 2009 të Gjykatës së Lartë për pushimin e çështjes në ngarkim të ish-ministrit. Rihapja e kësaj cështjes pas 12 vitesh, erdhi si pasojë e kërkesës se herëpashershme të familjares Zamira Durda, fëmija e së cilës mbeti viktimë e shpërthimit të Gërdecit në vitin 2008. Durda kërkoi nga SPAK rihapjen e cështjes , pasi sipas saj ish-ministri Mediu nuk u hetua pasi u mbrojt nga imunteti që kishte dhe dosja u mbyll në vitin 2009. Pak muaj më parë Prokuroria e Posaçme Kundër Korrupsionit dhe Krimit të Organizuar, SPAK i kërkoi gjykatës së lartë të nisë procesin e gjykimit për ish-ministrin e Mbrojtjes, Mediu në lidhje me shpërthimin e municioneve në fabrikën e demontimit në Gërdec, kërkesë e cila u rrëzua nga GJykata e Lartë. Shpërthimi në Gërdec ndodhi më 15 mars në vitin 2008 dhe nga shpërthimi humbën jetën të paktën 26 persona dhe qindra të tjerë mbetën të plagosur. Tragjedia ndodhi në një "fabrikë" për demontimin e armëve.