Zjarri në landfillin e Bushatit është riaktivizuar sërish. Flakët, të cilat kishin përfshirë venddepozitimin e mbetjeve, janë ndezur sërish megjithëse në zonë pati reshje shiu për dy ditë me radhë. Që prej 19 prillit kur nisi edhe zjarri, banorët e fshatrave të Vaut të Dejës, Shkodrës dhe Lezhës po bashkëjetojnë me tymin dhe aromën e rëndë nga djegia e mbetjeve në landfillin e Bushatit. Të favorizuara nga era, mbeturinat po vazhdojnë të digjen pavarësisht përpjekjeve të forcave zjarrfikëse. Aktualisht po hidhet dhe për të izoluar zjarrin, por tymi vazhdon të jetë ende shumë problematik për banorët. Për shkak të shtresave të depozitimit të mbeturinave, dyshohet se zjarri ka depërtuar në thellësi, duke e bërë më të vështirë fikjen e tij. Përpjekjet për shuarjen e flakëve po mbështeten edhe nga mjete të tonazhit të rëndë.