Deputetja e Partisë Demokratike Merita Bakiu deklaroi se Ministria e Arsimit nuk ka marrë asnjë masë lidhur me rezultatet e fundit të PISA-s, të cilat sipas saj treguan një gjendje të përkeqësuar të sistemit arsimor në vend. Deputetja demokrate thotë se nxënësit janë dekurajuar, mësuesit janë nën presion nga të gjitha palët, ndërsa drejtuesit e shkollave mbajnë vendin e punës duke shpërndarë propagandën e qeverisë. : Në dallim nga vendet e tjera, që kanë organizuar tryeza debati dhe kanë ngritur alarmin për gjendjen e arsimit të tyre, vetëm Shqipëria vijon t’i ngjajë asaj makinës në diktaturë që ecën vetëm me bori, por pa motor. Në vend që të kishte një reflektim nga institucionet përkatëse, Ministria e Arsimit i është “përgjigjur” dështimit, duke e thelluar edhe më tej propagandën qeveritare nëpër shkolla, duke i kthyer drejtuesit e shkollave në komisarë politikë dhe në shpërndarës të aktiviteteve politike dhe partiake. Sipas Bakiut, Partia Demokratike synon t’u japë mësuesve vendin e nderit që meritojnë, duke vendosur në qendër të misionit të tyre mësimdhënien dhe jo burokracinë.