Presidenti Ilir Meta ka përkujtuar këtë të shtunë 32 vjetorin e eksodit masiv të shqiptarëve, 2 korrikun 1990, ku shqiptarët çanë muret e ambasadës gjermane, duke nisur eksodin më të madh. “Rrugëtimi drejt Europës që nisi me guximin për të rrëzuar murin e Ambasadës Gjermane duhet përshpejtuar me vendosmërinë për të shkuar drejt anëtarësimit të plotë në BE.”, shkruan Meta teksa kërkon zbatim të reformave të kërkuara dhe thekson se koha për këtë është tani. Nga ana tjetër Kryedemokrati Sali Berisha nëpërmjet një postimi në rrjetet sociale shprehet se kjo datë shënjon plagosjen për vdekje të diktaturës dhe shembjen e Murit të Berlinit në Shqipëri. Berisha po ashtu nuk kursen kritikat për mosreagim të intelektualëve në atë kohë, teksa shton se pavarësisht kësaj, kjo kryengritje “me jehonen e saj te jashtezakonshme deshmoi se Shqiperia socialiste nuk ishte dhe nuk do mbetej shkemb graniti i socializmit ne Europe, apo Kuba e Adriatikut dhe se diktatura komuniste ne kete vend kishte hyre ne agonine e saj.” Berisha në shenjë mirënjohje shton: “Mirenjohja jone kete dite shkon edhe per ambasadorin e RFGJ Werner Daum dhe koleget e tij per mbeshtetjen e tyre te fuqishme per kryengritesit e 2 korrikut dhe popullin e shtypur shqiptar.” Ndërkohë lidhur me këtë datë ka reaguar edhe ish-kryedemokrati Lulzim Basha, i cili sulmon qeverinë për largimin e shqiptarëve, por nuk lë pa thumbuar as edhe ata që i quan si e shkuara e vendit. “Ndaj, përkujtimi i kësaj ngjarjeje historike, që pati forcën për ta përkulur regjimin komunist, shërben si një moment reflektimi, për t’u përballur me të shkuarën që rrezikon të përsëritet, sidomos përballë plagës së largimit të qindra-mijëra bashkëqytetarëve tanë, që tashmë nuk ikin prej diktaturës enveriste, por nga diktatura e korrupsionit, e cila nën qeverisjen e Edi Ramës ka marrë përmasat e një rreziku kombëtar.”, shkruan Basha.