Zhvlerësimi i euros po dëmton bizneset eksportuese dhe po shkakton humbje dyshifrore prej disa muaj radhazi. Në një deklaratë të përbashkët për shtyp, shoqatat e biznesit paralajmërojnë falimente dhe pasoja të rënda në ekonomi nëse nuk gjendet një mekanizëm nga institucionet përgjegjëse. Zusi: “Tashmë pasojat tepër të renda nga mbiçmimi i lekut me kursin e këmbimit po shfaqin efektet e para. Në tërësi në ekonomi, humbje dyshifrore prej disa muajsh radhazi po japin efekte drejtpërdrejt në xhepat e qytetarëve, që të ardhurat i kanë nga remitancat, jo pak nga ata që i kanë kredi për shtëpi në euro. Bizneset eksportuese por edhe ato prodhuese janë në limitet e rezistencës ekonomike e financiare të tyre. Po ashtu janë prodhuar dëme, pasojat e të cilave do të ndihen në muajt në vijim, por nëse zgjidhja e situatës nuk do të bëhet menjëherë pasojat afatgjata ekonomike dhe sociale do të jeën shumë të rënda.”