Forcat speciale RENEA zhvilluan gjatë natës një operacion të gjerë në zonën e Niklës në Krujë, si pjesë e hetimeve për vrasjen e Gilmando Danit, ngjarje e ndodhur tre ditë më parë pranë rrethrrotullimit të Rinasit. Aksioni, i kryer në bashkëpunim me strukturat e policisë së Krujës dhe Tiranës, zbuloi një shtëpi të mbushur me armë dhe lëndë shpërthyese. Në banesën e kontrolluar në fshatin Zall në Fushë-Krujë, u gjetën armë automatike, një mitraloz, granata, qindra municione të kalibrave të ndryshëm, kallëpe tritoli, kapsolla detonatore, si dhe lëndë plasëse të pajisura me celular për aktivizim në distancë. Në total, policia sekuestroi edhe 6000 fishekë, pajisje të ndryshme armësh dhe 2.25 kg kanabis. Autoritetet kanë identifikuar një person që dyshohet të jetë posedues i arsenalit, shtetasin Ylli Zalla 48 vjeç, i cili është shpallur në kërkim. Policia po punon për kapjen e tij dhe po heton për të verifikuar nëse ka lidhje me atentatin, ku mbeti i vrarë Gilmando Dani dhe u plagos rëndë Mustafa Shaljani i njohur dhe me mbiemrin Sheqeri.