Finalizohet operacioni policor i koduar "Driloni", në të cilin morën pjesë forcat RENEA dhe ato të policië vendore për kapjen e autorëve të dyshuar të dy ngjarjeve të ndodhura në harkun kohor të pak ditëve pranë një hoteli në Tushemisht. Gjatë operacionit, në pyllin e fshatit Vërdovë në Pogradec, në një çadër që kishte ngritur enkas për t’u strehuar, Policia kapi organizatorin e këtyre ngjarjeve, person me precedent të theksuar kriminal, i cili mbante dhe armë zjarri pistoletë me vete. Gjithashtu u kapen dhe arrestuan edhe 3 bashkëpunëtorë të tjerë të implikuar. Nën cilësinë e provës materiale është sekuestruar një armë zjarri tip pistoletë, municion luftarak dhe rrobat e përdorura për të drejtuar motomjetin gjatë kryerjes së këtyre ngjarjeve. Në vijim të punës intensive hetimore për zbardhjen dhe dokumentimin e plotë të ngjarjeve të ndodhura në datën 1 dhe 8 gusht pranë hotelit në pronësi të shtetasit Jetmir Mucllari renea ndërhyri dhe arrestoi Ilir Berberin 52 vjeç, me precedentë të mëparshëm penalë në fushën e krimeve kundër personit, pronës dhe sigurisë publike.