Forcat special RENEA janë vënë në zbatim të një plani masash për arrestimin e personave me precedentë të theksuar kriminale. Nisur nga ngjarjet e fundit në Elbasan, zonë, që është konsideruar si më problematike e viteve të fundit, trupat policore kanë ndërmarrë mbrëmjen e së dielës kontrolle të shumta, duke bërë të mundur arrestimin edhe të dy personave të tjerë të kërkuar, të dyshuar si pjesëmarrës në vrasjen e Bujar Celës, në rrethrrotullimin e Bradasheshit. Prej një jave Elbasani është kthyer në kryefjalë e të gjitha lajmeve të ditës. Në hartë pas Elbasanit janë Shkodra, Tirana e Vlora. Por jo më pak Durrësi dhe Fieri. Vrasjet e shkurtit të vitit 2016 treguan se qyteti i Elbasanit vazhdon të mbetet një pikë e nxehtë ku aktiviteti i krimit të organizuar vazhdon të jetë prezent edhe pas shkatërrimit të dy bandave famëkeqe të “Mandelës” dhe “Tan Kateshit”.