Mbi 620 të vdekur dhe të paktën 2300 të zhdukur ka mbërritur bilanci i tragjedisë së përmbytjeve masive në Nepal, teksa në anën kineze të kufirit raportohen mbi 550 të zhdukur, gjysma e të cilëve shtetas të huaj. Agjencia e Nepalit për Menaxhimin e Fatkeqësive bëri me dije se 933 punonjës të hidrocentralit që u godit i pari rezultojnë të zhdukur. Hidrocentrali ndodhet pranë kufirit me Kinën, ndërsa disa të mbijetuar dyshohet se kanë mbetur të bllokuar në tunelet e impiantit. Sipas Kryqit të Kuq, fatkeqësia ka prekur mbi 90 mijë njerëz në total. Shanset për të gjetur të mbijetuar po zvogëlohen ndjeshëm, ndërsa ekipet e shpëtimit përballen me vështirësi për të arritur në zonat e prekura. Kushtet e rënduara kanë vështirësuar edhe shpërndarjen e ujit të pijshëm dhe furnizimeve bazë. Në anën tjetër të kufirit, në Tibet, reshjet e dendura, rrugët e bllokuara, terreni i vështirë dhe rreziku i përmbytjeve të reja po pengojnë operacionet e kërkim-shpëtimit. Zona e fatkeqësisë në Tibet është e mbyllur për gazetarët e huaj, ndërsa informacioni për situatën vjen kryesisht nga mediat shtetërore kineze.