1610 persona të tjerë kanë humbur jetën në britaninë e madhe, shifra më e lartë e raportuar kjo në një ditë të vetme që nga fillimi i pandemisë. Kjo do të thotë se numri total i viktimave, ka shkuar tashmë në mbi 90 mijë. 33.355 raste të reja pozitive janë regjistruar, më pak se gjysma e rekordit prej 68053 rasteve ditore të regjistruara më 8 janar dhe shifra më e ulët ditore që nga 27 dhjetori. Një total prej 4266577 persona kanë marrë tashmë dozën e parë të një vaksine. Ekspertët britanikë thonë ndërkohë se ka sinjale pozitive që tregojnë se sakrificat e britanikëve po funksionojnë dhe duhet vijuar me respektimin strikt të masave të marra. Sipas tyre reduktimi i kontakteve me të tjerët dhe qëndrimi në shtëpi do të cojë në një rënie të shifrave në kohë. Shifrat e reja vijnë ndërsa vlerësimet nga zyra kombëtare e statistikave tregojnë se një në 10 persona në britaninë e madhe ka rezultuar pozitiv për antitrupa në dhjetor. Ndërkohë që vetë sekretari i shëndetësisë, matt Hancock, ka hyrë në vetëizolim pasi u paralajmërua nga shërbimi kombëtar i shëndetit si kontakt i një personi pozitiv. Ai tha se vetëizolimi është ndoshta pjesa më e rëndësishme e distancimit social dhe i kërkoi edhe të tjerëve të bënin të njëjtën gjë nëse do tu kërkohej.