Qeveria ka miratuar modelin e ri të organizimit dhe llogaridhënies në administratën shtetërore. Në mbledhjen e kësaj të mërkure, Këshilli I Ministrave, miratoi projektligjin “Për disa ndryshime në ligjin për organizimin dhe funksionimin e administratës shtetërore”, duke synuar modernizimin e organizimit dhe rritjen e llogaridhënies së institucioneve publike, në funksion të afrimit me standardet më të mira evropiane. Një praktikë kjo që ndryshohet pas 14 vitesh nga zbatimi I akteve themelore që rregullonin veprimtarinë e administratës shtetërore. Në funksion të rritjes së llogaridhënies dhe transparencës, projektligji vendos një sistem të unifikuar monitorimi të performancës në administratën shtetërore, duke standardizuar proceset e planifikimit dhe raportimit nga të gjitha institucionet e varësisë tek ministritë përgjegjëse. Kështu për herë të parë, raportet e performancës së secilit institucion do të publikohen për qytetarët, me qëllim forcimin e transparencës. Projektligji rikoncepton gjithashtu dhe organizimin e institucioneve joministrore, duke i ndarë ato në dy kategori kryesore: institucione varësie dhe agjenci autonome. Projektligji kufizon gjithashtu krijimin e institucione me numër të vogël punonjësish, funksionet e të cilave mund të përthithen ose të ushtrohen në mënyrë më efikase nga ministritë përkatëse. Në nivelin e menaxhimit të brendshëm institucional forcohet roli i drejtorive të përgjithshme, të cilat do të jenë tashmë instanca më e lartë vendimmarrëse për proceset rutinore, përveç rasteve kur ligji ngarkon ministrin ose sekretarin e përgjithshëm për marrjen e vendimit, duke reduktuar centralizimin aktual të vendimmarrjes. Njëherësh, kjo pritet të lehtësojë peshën e proceseve administrative që aktualisht kalojnë përmes Sekretarëve të Përgjithshëm, duke u mundësuar atyre të fokusohen më shumë te drejtimi strategjik dhe prioritetet institucionale. Nisma përcakton qartë dhe rekrutimin apo largimin e punonjësve nga puna, duke u bazuar tek Kodi I Punës dhe vjen në bashkëpunim dhe me Komisionin Europian duke synuar ndërtimin e një administrate modern.