Dëgjesat e deputetëve të komisionit të reformës territoriale vijuan me kryebashkiakët e Gramshit dhe Kolonjës, Besjon Ajazi dhe Erion Isai. Ky i fundit u ndal tek decentralizimi, kur tha se kompetencat e pushtetit vendor duhet të shtrihen më tej edhe në arsim e shëndetësi. “Padyshim ka funksione si ai i rrugëve rurale, për të cilët duhet ta them se është bërë një decentralizim jo i drejtë. Mjafton t’ju marr një shembull që buxheti që u shoqërua si decentralizim për rrugët rurale për bashkinë e kolonjës, ishte shumë herë më i vogël sesa buxheti që ARRSH harxhonte për mirëmbajtjen e aksit të vjetër Leskovik-Çarçovë, pra shumë decentralizime ndodhën me shoqërim buxheti shumë të ulët ose zero. Sot bashkitë janë përgjegjëse për infrastrukturën e shkollave, por skanë asnjë kompetencë mbi zhvillimin e mësimit apo marrin pjesë apo jo mësuesit në shkollë. E njëjta gjë edhe për qëndrat shëndetësore. Mendoj se do ishte mirë një decentralizim i plotë, shoqëruar me një buxhet të plotë.”