Duke nisur nga java e ardhshme dhe deri në një vendim të dytë, në rrugët e Tiranës do të reduktohet flota e autobusëve të transportit urban. Ky është vendimi i Unionit të Transportit Publik. Unioni thotë se ky vendim vjen si pasojë e sfidave të shumta financiare me të cilat po përballen operatorët e këtij shërbimi. “Pavarësisht se shqetësimi është adresuar disa herë“, thotë Unioni, “nuk është marrë asnjë masë parandaluese për të zbutur situatën“. Unioni i Transportit u kërkon organeve përgjegjëse që të nisin një dialog konstruktiv për të adresuar shqetësimet financiare dhe sfidat operacionale që po prekin këtë shërbim. Reduktimi do të prekë të gjitha linjat urbane qytetase. Sipas një pjese të operatorëve, kostot tejkalojnë të ardhurat e siguruara nga biletat dhe mbështetja e organeve shtetërore. Për këtë arsye, ata kanë kërkuar rritje të çmimit të biletës, si dhe subvencionim të naftës.