Raundi i radhës në Bruksel për bisedimet mes Prishtinës dhe Beogradit do të jetë në 18 gusht, por për presidentin serb Aleksandër Vuçiç, asgjë nuk do të ndryshojë. Në një konferencë për shtyp, Vuçiç tha se nuk pret asnjë rezultat në takimin mes tij dhe kryeministrit të Kosovës, Albin Kurti. Një prej pikave që i çon bisedimet mes liderëve në krah të kundërt është ajo e tensioneve të ashpra të ditëve të fundit për shkak të vendosjes së reciprocitetit. Kryeministri i Kosovës dhe presidenti i Serbisë do të takohen me shefin e diplomacisë së BE-së, Josep Borrell, dhe përfaqësuesin e posaçëm të bllokut për dialogun, Miroslav Lajçak. Sipas Vuçiç, Prishtina po imponon vullnetin e saj, ndërsa shtoi se kërkesa e Kurtit për Asociacionin e komunave me shumicë serbe, që duhet të jetë në përputhje me Kushtetutën e Kosovës, është e panegociueshme.