Ministria e Bujqësisë dhe Zhvillimit Rural ka konfirmuar rastin e parë të Influencës Aviare të tipit H5N8, në Durrës. Ditët e fundit u dha alarmi se në Durrës kishin ngordhur qindra pula, ndërsa u dyshua që kjo kishte ardhur si pasojë e gripit të shpendëve. Ministria e Bujqëisë sqaron se pasi u kryen disa analiza në kampione të ndryshme, në stabilimente të ndryshme, në të gjithë vendin, u konfirmua se sëmundja e laringo-trakeik është gjendur vetëm në dy stabilimente në Durrës. Sipas njoftimit zyrtar, janë marrë të gjitha masat për kufizimin e përhapjes së kësaj sëmundje duke përcaktuar perimetrin e zonës nga e cila ndalohet lëvizja e shpendëve, produkteve dhe nëprodukteve të tyre. Deri më tani, nuk ka prova epidemiologjike se ky virus mund të transmetohet tek njerëzit përmes ushqimit. Ministria e Bujqëisë fton konsumatorët të mos bien pre e spekulantëve që mund të tregtojnë mish shpendësh pa certifikatë veterinare ose në kushte të papërshtatshme tregtie apo magazinimi.