Komisioneri për Zgjerimin e Bashkimit Evropian, Oliver Varhelyi, do të vijë në Tiranë këtë të martë në mbrëmje. Lajmi është dhënë që një ditë më parë nga kryetari I Kuvendit Gramoz Rucci në seancën plenare, por tashmë ambasadori I BE, Luigi Soreca ka zbuluar axhendën e komisionerit. Sipas një postimi në rrjetet sociale nga Soreca, komisioneri Varhelyi do të flasë të mërkurën në Kuvendin e Shqipërisë. Gjithashtu ai do të takohet me presidentin Ilir Meta, kryeministrin Edi Rama dhe kreun e PD-së Lulzim Basha. Komisioneri për Zgjerim do të takojë gjithashtu edhe drejtuesit e vettingut. Vizita e Oliver Varhelyi në vendin tonë është në kuadër të një turi të komisionerit në rajon për të prezantuar Raportet Vjetore për zgjerimin në vendet kandidate për BE, si dhe Planet Ekonomike dhe ato të Investimeve të Bashkimit Evropian në këto vende.