Departamenti amerikan i Shtetit ka publikuar raportin vjetor mbi Klimën e Investimeve, ku përfshin më shumë se 160 vende të botës, përfshirë edhe Kosovën. Në pjesën që flet për Kosovën, në raprt theksohet se tensionet që vijojnë të jenë prezente me Serbinë dhe integrimi i kufizuar rajnal vazhdojnë të jenë pengesë për tërheqjen e investimeve të huaja. Në raport thuhet se Kosova ka marrë masa për të përmirësuar klimën e investimeve me veprimet e qeverisë për të thjeshtuar regjistrimin e bizneseve dhe për të zvogëluar pengesat burokratike, por rritja ekonomike dhe produktiviteti vazhdojnë të kufizohen nga ekonomia joformale, varësia nga remitencat për konsum dhe shkalla e lartë të papunësisë mes grave dhe të rinjve. Ndërkohë thuhet më tej se politikat ekonomike të qeverisë, ndërhyrja në ekonomi dhe dialogu i kufizuar publiko-privat, paraqesin gjithashtu sfida për investitorët. Investitorët i tërheq popullsia e re e Kosovës, kostoja e ulët e punës, afërsia me tregun e BE-së dhe burimet natyrore. Sakaq theksohet se dërgesat nga diaspora vazhdojnë të përfaqësojnë një pjesë të konsiderueshme të bruto prodhimit vendas në Kosovë.