Bashkimi Evropian nuk ka pajtim të plotë për heqjen e masave ndëshkuese të vendosura ndaj Kosovës. Sipas Radio Europa e Lirë, masat ndaj Kosovës priten që të hiqen pjesërisht dhe gradualisht. Në diskutimet që u zhvilluan më 19 qershor në Komitetin për politikë dhe siguri të BE-së, shumica e shteteve të BE-së ishin në favor të heqjes së plotë të masave, siç edhe ka rekomanduar përfaqësuesi për politikë të jashtme dhe siguri, Josep Borrell, në raportin që u dorëzoi vendeve anëtare, lidhur me hapat që Kosova ka ndërmarrë për uljen e tensioneve në veriun e banuar me shumicë serbe. Pas shqyrtimit të hapave që Kosova ka ndërmarrë në përmbushjen e kritereve specifike të BE-së, Borrell rekomandoi që Kosovës t’i hiqeshin masat dhe Prishtina ta shfrytëzonte si mundësi që të ulen tensionet dhe që të shmangen veprimet e pakoordinuara.