Qeveria izraelite dhe Autoriteti Palestinez kanë lëshuar një deklaratë të përbashkët për marrjen e hapave që çojnë në ulje të dhunës. Kjo deklaratë është lëshuar të dielën, pas bisedimeve të rralla mes dy palëve, që janë zhvilluar në Jordani, në të cilat kanë marrë pjesë edhe zyrtarë nga Shtetet e Bashkuara dhe Egjipti. Në takim është arritur pajtueshmëri për të bërë hapa drejt rritjes së besimit dhe për të punuar drejt “paqes afatgjatë”. Në kohën e nisjes së bisedimeve, një sulmues palestinez ka qëlluar për vdekje dy izraelitë në Bregun e pushtuar Perëndimor. Ushtria izraelite ka thënë më vonë se do të shtojë dy batalione shtesë për rritje të sigurisë. Si përgjigje, kryeministri izraelit, Benjamin Netanyahu, ka thënë se administrata e tij “do të vazhdojë të bëjë gjithçka për të luftuar terroristët dhe për të ruajtur sigurinë e Izraelit”. Këshilltari amerikan për Siguri Kombëtare, Jake Sullivan, ka thënë se ka mirëpritur zotimet e bëra nga të dyja palët, duke shtuar se duhet bërë më shumë punë në muajt në vazhdim “për të ndërtuar një të ardhme stabile për izraelitët dhe palestinezët”.