Pas vendimit për të mbyllur Tik-Tokun dhe qëndrimeve të kritikëve kundër, ka reaguar numri një I qeverisë shqiptare, Edi Rama. Në një postim në rrjtin social X, Rama shprehet se vendimi për mbylljen e Tik -Tok vjen pas një këshillimi të gjerë. “Ndalimi i TikTokut për (të paktën) një vit në Shqipëri, nuk është një reagim i nxituar ndaj thjesht një ngjarjeje, por një vendim i këshilluar gjerësisht me komunitetet e prindërve në shkollat e gjithë Shqipërisë. TikToku nuk ka çfarë sqarimesh kërkon nga Shqipëria, sepse në Shqipëri vendosin shqiptarët jo pronarët e algoritmit të TikTokut. Ndërsa Shqipëria është shumë e vogël për t’i kërkuar TikTokut të mbrojë fëmijët dhe rininë nga humnerat e frikshme të algoritmit të tij, por uron që TikToku ta bëjë këtë për të mirën e të gjithë njerëzimit, përfshirë edhe Shqipërinë.”, shkruan Rama. Kryeministri u kthen përgjigje edhe qëndrimeve se vrasja e Martinit nuk ka ardhur nga Tik-Tok, pasi nuk kanë patur llogari në të. “Të thuash se vrasja e nxënësit adoleshent s’ka lidhje me TikTokun, sepse konflikti nuk qenka gjeneruar nga Tik Toku do të thotë të mos kesh kuptuar as seriozitetin e kërcënimit që ajo plaftormë ka sjellë për fëmijët dhe rininë e kësaj kohe, as fillin e arsyetimit të vendimit tonë për të marrë përgjegjësinë e reagimit ndaj atij kërcënimi.”, thekson kryeministri. Sipas tij vendimi ka ardhur për shkak se mbi 90% e prindërve kërkojnë mbylljen e këtij rrjeti social, pasi fëmijët janë të ekspozuar përballë dhunës. “Ose vetë TikToku duhet t’i mbrojë fëmijët e Shqipërisë ose Shqipëria do t’i mbrojë fëmijët e vet nga TikToku”, mbyll postimin e tij Rama.