Do të ishte dalja e parë fizike e presidentit ukrainas Volodimir Zelenski në një takim të këshillit të sigurimit të OKB-së për pushtimin rus të vendit të tij, dhe ambasadori rus atje, Vasili Nebenzia, u zemërua jo pak nga ulja e tij në tryezë në fillim të takimit – shkruan agjencia e lajmeve Reuters. Kryeministri shqiptar Edi Rama, president i seancës së tensionuar, u përgjigj me një thumbim për moskën, e cila prej kohësh thotë se pushtimi nuk është luftë por një operacion i posacëm ushtarak...“Dua të citoj kolegët tanë rusë dhe këdo tjetër këtu se ky nuk është një operacion special i presidencës shqiptare”, citon reuters Ramën duke nënvizuar se ai është i njohur për sensin e tij thumbues të humorit, ndërkohë që deklarata u shoqërua me të qeshura të mbytura në sallë. “Ka një zgjidhje për këtë”, vazhdoi Rama duke iu drejtuar direkt Nebenzias: “Nëse jeni dakord, ndaloni luftën dhe presidenti zelenski nuk do të flasë”...Por, thotë Reuters, sigurisht që Nebenzia nuk pranoi. Ai tha se sesioni ishte një shou dhe kritikoi Ramën për ato që sipas tij ishin deklarata të ngarkuara politikisht dhe jo një qëndrim si gardian neutral i procedurës. Pas sesionit, vijon Reuters, Zelenski falenderoi Ramën në median sociale duke thënë se shqiptari, që është një artist dhe ish lojtar basketbolli, i tregoi botës se si duhej të sillej me rusinë, gënjeshtrat dhe hipokrizinë e saj. Duke hyrë në sallë pasi zelenski u largua, ministri i jashtëm rus, sergei Lavrov mbrojti të drejtën e vetos së rusisë në këshill, duke e quajtur atë legjitime, e duke akuzuar Kievin dhe perëndimin se janë selektivë për sa i takon parimeve të kartës së OKB-së. Ndërkohë, përvec agjencisë së lajmeve Reuters, udhëheqja e sesionit të këshillit të sigurimit nga kryeministri shqiptar, ka tërhequr vëmendjen edhe të shumë mediave të tjera ndërkombëtare.