Ulur në gjunjë dhe me duart bashkuar, njëjtë siç luten katolikët italianë përpara ikonave fetare. Kjo është qasja e kryeministrit të Shqipërisë, Edi Rama sa herë takon homologen e tij italiane, Giorgia Meloni. Pak minuta para takimit, Rama publikoi një foto ku mbante në duar e lexonte disa shkresa. “Duke përsëritur mësimet përpara takimit, se motra e Italisë nuk të fal me njohuritë që ka për çdo projekt.” – shkrunte shefi i ekzekutivit në rrjetet sociale. Në Pallatin Chigi, Rama u prit me ceremoni zyrtare nga kryeministrja Giorgia Meloni, me të cilën pati edhe një takim ‘kokë më kokë’ me në fokus ecurinë e bashkëpunimit mes dy vendeve. Pjesë e delegacionit shqiptar ishin edhe dy ministrat, Ervin Demo dhe Delina Ibrahimaj. Krahas Melonit, pjesë e takimeve të Ramës përtej Adriatikut ishte edhe ministri i mbrojtjes, Guido Cresetto.