Kryedemokrati Sali Berisha gjatë një konferencë nga selia blu hodhi akuza ndaj Prokurorisë së Posacme, e cila sipas tij përbën një institucion politik që dosjet e opozitës nuk i prek. ‘SPAK-u vazhdon të jetë një organ politik. Nga 43 dosje të dokumentuara, jo më shumë, po që janë të finalizuara që ata kanë shqyrtuar për krimin elektoral, kanë çuar në gjykatë vetëm një, mbyllin masivisht. Organ i shtypjes së pluralizmit politik. Pra në qoftë se qeveria nuk çon dosje, opozita çon dosje aty dhe ata dosjet e opozitës kanë tmerr t'i prekin. Se u thotë partia.’ Kreu i Partisë Demokratike shtoi se ekzekutivi i ka shpallur luftë haptazi institucionit të akuzës, duke bërë në këtë mënyrë të pamundur luftën kundër korrupsionit. Berisha riktheu vëmendjen te rasti Balluku, ku sipas tij Rama del 100% i implikuar në dosjen e saj, ku shtoi se për herë të parë mazhoranca nuk heq imunitetet, vetëm ato të lidhura me Kryeministrin.