Kryeministri Edi Rama u përfshi në një debat me gazetaren e CNN, Eleni Giokos, gjatë pjesëmarrjes në Forumin Botëror të Investimeve Future Investment Initiative, ku diskutimi u fokusua te projekti i planifikuar në zonën e Zvërnecit, reagimet e ambientalistëve dhe protestat e zhvilluara kundër tij. Gjatë bashkëbisedimit, Rama pati edhe një përplasje me gazetaren, pasi kjo e fundit e pyeti lidhur me protestat në Tiranë, duke i thënë kësaj të fundit se nuk është objektive në punën e saj si gazetare. “Dëgjo, mos shko aty, sepse tani më kujton që je nga CNN dhe më vjen keq ta them, por e kam mësuar në mënyrën e vështirë se ju nuk jeni një burim objektiv. Por fakti që je greke më bën të ndihem i detyruar të mos shkoj aty. Po, toka është blerë nga investitorët. Po, është tokë private. Po, është duke u zhvilluar një vlerësim i ndikimit në mjedis. Po, ende nuk është miratuar asnjë projekt. Po, ende nuk është dhënë asnjë leje ndërtimi. Po, nuk ka asgjë që duhet të shqetësojë ndonjë ambientalist që mendon drejt.”