Tërheqja e ofertuesit të vetëm për ndërtimin e portit të ri tregtar në Porto Romano, sipas kryeministrit Edi Rama, është argumentuar nga kompania me krizën ekonomike, që ka rritur kostot e ndërtimit. Megjithatë Rama ka pranuar se për ndërtimin e kësaj nyje strategjike ka pasur presion të vazhdueshëm nga faktorë që nuk lidhen me Uashingtonin. Rama: “Nuk kemi të dhëna që kompania është ndodhur nën ndonjë presion, por i gjithë procesi është zhvilluar nën presion, po jo nën presionin e Shteteve të Bashkuara të Amerikës, siç thuhet, pa asnjë argument. Se nuk ka pasur absolutisht jo presion, po s'ka pasur asnjë shqetësim të shprehur, as nga Shtetet e Bashkuara të Amerikës, as nga Bashkimi Evropian, as nga askush. Por ka pasur një presion të vazhdueshëm nga faktorë të tjerë, natyrisht të painteresuar që ai port të jetë një histori suksesi. Nëse ju mendoni që porti i ri është një portë, që ata të cilët, i kanë lidhur interesat me rrugët e trafiqeve, mezi po e presin, - ju mendoni gabim, përkundrazi, nuk kanë asnjë arsye ta mirëpresin.”