Kryeministri Edi Rama akuzoi Gjykatën Kushtetuese se me vendimin për pagat e magjistratëve ka tejkaluar kompetencat e saj. Rama - “Kompetenca e Gjykatës Kushtetuese si një organ gjyqësor dhe jo politik nuk duhet të ndërhyjë ne sferën e ligjvënësit kushtetues i cili ka kompetencën ekskluzive për te krijuar norma te reja kushtetuese. Kufiri ndërmjet interpretimit të një norme ekzistuese dhe krijimit të një norme të re nuk është gjithmonë i lehtë për t'u përcaktuar, por duhet shmangur perceptimi i një qeverisje të gjyqtarëve dhe kompetenca për te krijuar norma të reja kushtetuese i përket pushtetit ligjvënës, ndërsa Gjykatës Kushtetuese i përket kompetenca për të interpretuar në mënyrë autoritative normat”. Rama shtoi më tej… Gjykata Kushtetuese nuk mund t'i thotë kurrë, në asnjë rast dhe për asnjë arsye një pushteti të pavarur si ai i Kuvendit se si duhet të ngrejë dorën. Kjo nuk ndodh. Dhe tani ngrije dorën për tekstin që ta kam shkruar unë, për formulën që kam zgjedhur unë dhe për shumën që kam vendosur unë, Gjykata Kushtetuese nuk ja thotë dot Kuvendit të Shqipërisë dhe këtu ka deputetë që kanë shumë vite në këtë Kuvend. Në fund, mazhoranca votoi me 84 vota pro formulën e pagave të magjistratëve, që i rrit nga 0.36 për qind në 0.38 për qind të rrogës së Presidentit.