Kryeministri Rama nuk ka preferuar një deklaratë në vetë të parë për pretendimet e Ambasadës Franceze në Tiranë, lidhur me vaksinën, apo marrjen e saj si shembull. Shefi i qeverisë shqiptare ka dhënë përgjigjen e tij në rrjetin social facebook, duke i kthyer përgjigje një komentueseje, e cila nuk ka qenë aspak dakord me cfarë është deklaruar. “Unë nuk kam sulmuar asnjë aleat dhe aq më pak Francën ne rastin konkret! As nuk e kam harruar dhe nuk e harroj që Bashkimi Europian e ka ndihmuar Shqipërinë, qyshse vendi ynë doli nga burgu i diktatures e deri më sot. Përkundrazi, e kam çmuar dhe e çmoj pa lëkundje Bashkimin Europian, për njëmijë e një arsye, përfshirë pa dyshim edhe ndihmën e paçmuar që i jep Shqipërisë tash 30 vjet” Kryeministri e cilëson një amanet të shqiptarëve Bashkimin Evropian, pa lënë pas edhe Francën, si një vend të mrekullueshëm. “Franca është jo vetëm një nga vendet më të mrekullueshme të botës e më të përparuara të Europës në çdo drejtim, as thjesht një vend mik e aleat i Shqipërisë, po edhe një vend i veçantë në zemrën e në mendjen time, ashtu sikundër është edhe BE-ja një amanet e një destinacion i patjetërsueshëm i Shqipërisë e shqiptarëve” Por, për të gjihë ndjekësit në facebook, Rama ka një këshillë, të mos mërzitet, sepse edhe vetë ai këtë bën, packa se cfarë shkruhet e thuhet për të. “Ankesa e Ambasadës Franceze nuk ndryshon asgjë në asnjë drejtim, ashtu siç e drejta për të menduar ndryshe vlen si gjithnjë njësoj si për Francën edhe për Shqipërinë në këtë rast; si për hartuesit e ankesës në emër të Francës, si për mua që flas në emër të Shqipërisë. Një fjale e bukur popullore thotë se miqësia e vërtetë nuk i ka të gjitha fjalët prej mjalti, kështu që as ti mos u mërzit, as ambasada s'ka pse mërzitet, se unë jo e jo, çfare nuk dëgjoj po nuk mërzitem”