Edhe Kryeministri Rama ka reaguar pas lajmit të Euroactiv, duke qëndruar në të njëjtën linjë me ministrin Ferit Hoxha lidhur me raportimin e bërë nga ana e gazetarit, që sipas kreut të qeverisë ka shtrembëruar citimin e kryediplomatit për çështjen e marrëveshjes me Italinë për kampin e emirantëve. Në një postim në platformën X, Rama u bën apek të gjithë gazetarëve në Itali por jo vetëm që të mos bien pre e dezinformimit, ndërsa rithekson se Protokolli me Italinë do të vijojë për aq kohë sa qeveria italiane të dëshirojë. “Të gjithë gazetarëve nga Italia dhe më gjerë, të cilët po kontaktojnë lidhur me një citim të shtrembëruar të raportuar nga një media pas një interviste me Ministrin e Jashtëm të Shqipërisë: Më lejoni ta ritheksoj, qartë dhe shpresoj njëherë e përgjithmonë, se Protokolli ynë me Italinë është këtu për të qëndruar, për aq kohë sa Italia ta dëshirojë.”, shkroi kryeministri në platformën X.