Shqipëria shënon hapa të qëndrueshëm drejt unionit europian më 14, 15 dhe 16 tetor, kur axhenda ndërkombëtare do të prevalojë arenën politike. Kreu i qeverisë, Edi Rama do të udhëtojë fillimisht drejt Berlinit, ku këtë të hënë mbahet samiti i Procesit të Berlinit. Nisma e kancelares gjermane Angela Merkel mbush një dekadë që prej themelimit të saj, dhe në këtë përvjetor të veçantë liderët e Ballkanit Perëndimor dhe vendeve partnere do të mblidhen në Berlin, për të diskutuar lidhur me bashkëpunimin rajonal, tregun e përbashkët dhe axhendën e gjelbër të Ballkanit Perëndimor. Më 15 tetor, mbahet konferenca e dytë ndërqeveritare mes Shqipërisë dhe Bashkimit Europian në Luksemburg. Takimi do të shërbejë për hapjen e negociatave me Shqipërinë për grupkapitujt e parë ku përfshihen: Funksionimi i institucioneve demokratike, Reforma e administratës publike, gjyqësori dhe të drejtat themelore, drejtësia, liria dhe siguria, kriteret ekonomike, prokurimi publik, statistikat dhe kontrolli financiar. Ndërkohë më 16 tetor, pritet që Komisioni Europian të miratojë fondin që do i alokohet Shqipërisë në kuadër të planit të rritjes. Sipas përllogaritjeve paraprake dhe jozyrtare, parashikohet që Shqipëria të përfitojë rreth 922 milionë euro nga ky plan, pas përpilimit dhe depozitimit të planit të reformave që vendi ynë do të ndërmarrë në kuadër edhe të përafrimit me unionin europian.