Në prag të fillimit të sezonit veror, shefi i ekzekutivit, Edi Rama u kërkoi operatorëve turistikë të Vlorës të jenë më largpamës në caktimin e çmimit të shërbimeve të tyre. Kjo, për të garantuar një ofertë turistike konkurruese. “Nëse Vlora do marrë njollën e vendit ku ti paguan më shumë se çfarë të ofrohet dhe se në turqi, Kroaci, ju i keni bërë gropën vetes. Pra duhet një strategji afatmesme sesi do merrni një fitim të arsyeshëm dhe jo fitimin që mund ta merrni dhe tju kthehet në boomerang. Por, bëni si të doni, qeveria nuk vendos çmime. Dua që çfarë kemi mbjellë ta korrim për gjenerata, jo për një stinë.” Rama u ndal edhe tek projekti i dhëndrit të presidentit amerikan, Jared Kushner në jug të vendit. Duke hedhur poshtë zërat kritikë, Rama tha se ishulli i Sazanit do të mbetet gjithmonë i Shqipërisë. “Sazani është i Shqipërisë dhe do të mbetet i Shqipërisë. Ne akoma dhe sot nuk i kemi mbyllur negociatat për Sazanin. Shqipëria do të jetë pjesë e kompanisë që do të investojë dhe administrojë ishullin. Dhe në këtë pikë shqiptarët janë të përfaqësuar nga shteti. Nuk bëhet fjalë për të mbyllur ishullin. S’do jetë resort i mbyllur, s’do bëhet rezervat i privilegjuar. Projekti i Sazanit ka ndryshuar ë proces. Ato do të ketë shumë pak ndërtime dhe do të ketë një profil kulturor, artistik të rëndësishëm. Do të jetë një nga projektet më të bukura të zhvilluara në Mesdhe. Kjo do sjelli vetëm të mira për Vlorën” Kryeministri Rama shpalosi para operatorëve turistikë edhe ambiciet e qeverisë shqiptare për të ndërtuar dhe eksportuar anije ushtarake.