Në Bejrut kryeministri Edi Rama dhe Ministri i punëve të Brendshme Sandër Lleshaj bashkë me konsullin e përgjithshëm të Shqipërisë në Liban Marc Ghorayeb u takuan me Major Gjeneral Abbas Ibrahim drejtor i përgjithshëm për sigurinë. Qëllimi i takimit ishte falenderimi në emër të shtetit shqiptar për ndihmën e dhënë në nxjerrjen nga Kampi Al Hol të një gruaje dhe 4 fëmijëve shqiptarë. Që në fillim të takimit gjenerali Ibrahim është shprehur se ky ishte një fillim i mbarë në këtë proces të gjatë e të vështirë riatdhesimi. Pas shumë vuajtjeve në kampin sirian, 4 fëmijë shqiptarë dhe një grua po kthehen sot në vendin e tyre. Ndërkohë, burime nga Ministria e Brendshme e Shqipërisë thanë se janë kontaktuar fizikisht edhe 20 shqiptarë të tjerë në kampet e Sirisë, për të cilët do të ketë një fazë të dytë riatdhesimi. Ndërkohë, bëhet e ditur se janë rreth 50 shqiptarë të mbetur në Siri, një pjesë në kampin al hol.