Agjenda zyrtare e mbledhjes së zgjeruar mes grupit parlamentar të PS dhe kabinetit qeveritar nuk përmban diskutime në lidhje me situatën e brendshme në parti, pas largimit të deputetes Marjana Koçeku dhe mbështetjes publike të Elisa Spiropalit ndaj protestave. Dokumenti parashikon që diskutimet në Pallatin e Brigadave në Tiranë paraditen e së shtunës të nisin me informimin mbi konkluzionet e nxjerra nga konferenca e tetë ndërqeveritare Shqipëri-BE, ku deputetët do të adresojnë pyetjet e tyre ndaj përfaqësuesve të qeverisë. Pika e dytë rendit informimin mbi Paketën e Ligjeve që lidhen me procesin e anëtarësimit të Shqipërisë në BE. Pas mbledhjes së qeverisë të premten, ministrja e Ekonomisë, Delina Ibrahimaj tha se janë 9 ligje vetëm në fushën tregtare dhe të sipërmarrjes. Mbledhja do të ketë edhe një raportim mbi ecurinë e konsultimeve publike dhe punës në Komisionin e Reformës Territoriale, ku socialistët bashkëkryesojnë me Arbjan Maznikun. Kryetari i Grupit, Taulant Balla, parashikohet të bëjë një informim të zgjeruar mbi detyrat e lëna nga mbledhja e shkuar e të njëjtit format, përfshirë performancën e anëtarëve të Grupit parlamentar. Në këtë pikë mund të ketë diskutime në lidhje me situatën e krijuar brenda grupit.