Në sfondin e revolucionit të flamingove që prej tre javësh kërkon largimin e të majtëve nga pushteti dhe zërat kritikë që janë shtuar të radhët e socialistëve, kryeministri Edi Rama mblodhi drejtuesit politikë të qarqeve për të vendosur pikat mbi ‘i’ dhe për të dhënë udhëzime sa i takon situatës ku ndodhet Partia Socialiste, 35 vite pas themelimit të saj. Në mbledhjen me dyer të mbyllura, Rama i konsideroi protestat qytetare, më shumë një luftë digjitale, dhe i udhëzoi të tijët të jenë më shumë prezentë në rrjetet sociale e të mbajnë qëndrime publike. Po të njëjtën kërkesë Rama pati edhe në mbledhjen e zgjeruar mes grupit parlamentar dhe qeverisë, që u mbajt pak ditë më parë në Pallatin e Brigadave, dhe gjatë ditëve të fundit është vënë re një përfshirje më e madhe e deputetëve socialistë me reagime për protestuesit e veçanërisht për Dritan Goxhajn, një ditë më parë. Rama kërkoi po ashtu prezencë të shtuar të të majtëve në terren, për të marrë e adresuar problematikat e qytetarëve. Zyra e deputetëve në zonat elektorale pritet të jenë më funksionale dhe takimet e tyre me zgjedhësit të intensifikohen. Të gjitha shqetësimet e mbërritura prej tyre, më pas do të adresohen tek ministrat e kabinetit qeveriat, ku hallkë lidhëse do të jetë zëvendësministri.