Kryeministri Edi Rama në vijimësi të takimeve elektorale për zjedhjet e 25 prillit, ka takuar gra dhe vajza të cilave u bëri apel të marrin në dorë fatin e vendit. Sipas Ramës askush më mirë sesa gratë nuk e kupton se mënyra e vetme për të përballuar vështirësitë është të punosh. Rama komentoi edhe ftesën që i bëri publikisht kryetarit të partisë Demokratike, Lulzim Basha për një bashkëpunim në vitet në vijim. Kryeministri Edi Rama u shpreh se nuk bëhet fjalë për një ftesë për bashkëqeverisje si ajo e Berishës me Metën, nga mungesa e votave të mjaftueshme për të qeverisur i vetëm, por një ftesë për ta bërë politikën që ti ngjajë sadopak shqiptarëve. Thirrja për t’u bashkuar dhe vetëdija ime se bashkimi është domosdoshmëri, bindja ime se dalja nga tuneli i pandemisë për ta bërë diellin për të gjithë, nuk është thirrje për të bërë një qeveri bashkë siç bëri Saliu me Liken nga halli kur nuk kishte votat apo siç janë bashkuar partitë për interesa. Ne nuk kemi nevojë dhe nuk do kërkojmë vota nga të tjerë sepse më 25 prill do marrin shumicën e votave. Por është thirrje për ta bërë politikën që t’i ngjajë shqiptarëve përballë tërmetit dhe pandemisë. Shqiptarët në ato faza i bashkoi ajo që e vuanin njësoj nga brenda. Politika duhet të bëjë që bashkimi të mos vijë nga halli, por nga detyrimi ndaj njerëzve për ta bërë politikën një hapësirë ku njerëzit të mos kenë frikë të hyjnë. Një hapësirë ku shumë Ogerta, Etilda, Elisa, Bora, Edona të mos kenë frikë të hyjnë”