Kryeministri Edi Rama ka reaguar sërish lidhur me protestën për çështjen e Zvërnecit, duke komentuar pankartat dhe mesazhet ironike të përdorura nga protestuesit. Përmes një postimi në rrjetet sociale, Rama publikoi disa prej pankartave të protestës dhe tha se, ndonëse nuk ndan të njëjtin qëndrim me organizatorët, e vlerëson kreativitetin dhe humorin e shfaqur në materialet e përgatitura. Ai u shpreh se fjalimet dhe akuzat kundër projektit nuk i konsideron bindëse, por shtoi se memet dhe pankartat satirike i kanë tërhequr vëmendjen, duke përgëzuar autorët për imagjinatën e treguar. Kryeministri theksoi gjithashtu se debati po zhvillohet rreth një projekti që, sipas tij, do të kontribuojë në transformimin e mëtejshëm të Shqipërisë, ndërsa i cilësoi si të pabazuara shqetësimet dhe rreziqet që ngrihen nga kundërshtarët e tij. Ndërkohë, këtë të hënë do të zhvillohet dita e nëntë e protestës, e cila është pagëzuar me emrin “revolucioni i flamingos”.