Digjitalizimi i sistemit bankar dhe reduktimi i parasë që qarkullon cash në ekonomi konsiderohen prioritare. Në një takim të Kryeministrit Rama me përfaqësuesit e sistemit bankar dhe të industrisë së re Fintech, u soll në vëmendje se ligji i detyron bankat e nivelit të dytë aplikimi i protokolleve të open banking. Afati për implementimin e këtij sistemi është muaji qershor. Rama: “Nuk mund të jemi një vend që vazhdon me një volum cashi të papranueshëm në qarkullim duke pasur ndërkohë një shpenzim shumë të lartë të vetë prodhimit të letrës së parasë. Faktikisht ne jemi në situatën kur ligji jo unë, ligji e ka të shkruar e zeza mbi të bardhë që në janar të këtij viti duhet të ishte zbatuar nga të gjitha bankat e nivelit të dytë aplikimi i protokolleve të open banking. Më kujtohet kur kemi folur për marrjen seriozisht të kërcënimit kibernetik. U desh të ndodhte që banka të vihej në lëvizje.”