Viti 2024 pati për kryefjalë integrimin në Bashkimin Europian, sipas vlerësimit të kryeministrit Edi Rama, i cili në një intervistë për Corriere della Sera, shfaq ambicien që Shqipëria të bëhet pjesë e unionit brenda vitit 2030. I pyetur për zgjedhjet e vitit 2025, me fokus tek niveli i pjesëmarrjes në votime, nisur nga rënia e numrit të votuesve në Europë; Rama u shpreh se Shqipëria nuk është hasur me nivele të ulëta pjesëmmarrje, por se vitin e ardhshëm fokusi është tek vota e diasporës. “Në majin e ardhshëm, do të mirëpres me përulësi votën e qytetarëve, sepse ajo është ajo që ka rëndësi. Të kandidoj për një mandat të katërt dhe të kem një mbështetje që premton mirë është tashmë diçka e veçantë. Në Shqipëri, mund të them se ende mbajmë nivele të mira pjesëmarrjeje, duke marrë parasysh vetëm qytetarët rezidentë në vend. Do të jetë interesante të shohim se sa do të votojnë për herë të parë nga jashtë. Sa i përket Evropës, ndoshta po përhapet një ide gjithnjë e më e zakonshme që, në fund të fundit, asgjë nuk ndryshon dhe që votimi nuk ka ndonjë rëndësi. Kjo është shqetësuese, sepse mund të nënkuptojë që një histori e vjetër dhe shumë e keqe rrezikon të përsëritet.