Kryeministri Edi Rama nuk është tërhequr nga deklaratat e tij drejtuar Prokurorisë së Posaçme Kundër Krimit të Organizuar dhe Korrupsionit, edhe pas reagimit të kësaj të fundit. Nëpërmjet një postimi në Twitter, Rama nuk kursen ironitë, ndërsa e quan si marrje peng e gjykatësit pas asnjë arsye, por për interes të Ilir Metës. “Unë nuk i heq asnjë presje asaj që deklarova sot dhe nuk mjafton që SPAKU të thotë se e paska pushuar çështjen, pasi faktikisht e mori peng gjykatësin në fjalë pa asnjë arsye në botë, duke i shkuar praktikisht pas avazit Armikut NR.1 të Reformës në Drejtësi, Ilir Metës!” Ndërkohë Rama thekson se SPAK i detyrohet edhe një tjetër sqarimi. “Meqë ka marrë përsipër të sqarohet SPAKU do të duhej të sqaronte pse reagoi rrufeshëm për një kallzim absurd për një vepër penale imagjinare të njeriut të shpallur nga DASH kampion i antikorrupsionit,ndërkohë që për kampionët e korrupsionit në drejtësi s'ka lëvizur ende gishtin!” Nga ana tjetër opozita ka akuzuar Ramën se ka kapur SPAK dhe po ushtron presion ndaj këtij organi.