Në vend që të drejtojë gishtin nga presidenti amerikan Donald Trump, Europa do të duhet të veprojë dhe të harmonizohet. Kështu vlerësoi kryeministri Edi Rama në konferenën ‘Lennart Meri’ në Estoni. Sipas tij, mandati i dytë i Trump në krye të Shtëpisë së Bardhë, ka bërë që Europa ta shohë veten me të gjitha dobësitë e saj. Rama: “Në vend që të fajësojmë, të rrekemi të rivlerësojmë pozicionin tonë, duke drejtuar gishtin drejt Shteteve të Bashkuara të Amerikës apo presidentit Trump, na duhet të bëjmë një vlerësim të mirëfilltë, të përpiqemi të kuptojmë se konteksti sigurisht që ka ndryshuar, por cila do të jetë përgjigjja reale? Nuk mendoj se përgjigja reale duhet të jetë vetëm që të hidhemi në mbishpenzime dhe të mos trajtojmë problemet strukturore që kemi, sepse jemi shumë vende, së bashku jemi një ekonomi e madhe, po kur vjen fjala pastaj tek e gjithë mënyra me të cilën duhet të veprojmë dhe të harmonizohemi, nuk jemi më ashtu siç dukemi kur shihemi si një shumë aritmetike e PBB-ve tona. Nuk e kuptoj kur europianët harxhojnë kohë me “çfarë tha Trumpi”, unë besoj më shumë miqtë amerikanë kur thonë: merreni presidentin Trump seriozisht, por jo fjalë për fjalë, pra pjesa serioze është që presidenti Trump ka bërë që Europa ta shohë veten me të gjithë dobësitë e saj.”