Pas përplasjeve në distancë për protestën e UÇK-së të mbajtur në Tiranë dhe qëndrimeve ndër vite ndaj Gjykatës Speciale, dy kryeministrat Edi Rama dhe Albin Kurti, pritet të ulen në një tryezë të përbashkët në samitin e Procesit të Berlinit që do të mbahet në Londër më 22 tetor. Bisedimet do të ndalen tek siguria, zhvillimi dhe migrimi. Pjesëmarrës do të jenë liderët e gjashtë vendeve të Ballkanit Perëndimor, të cilët do të kenë deklarata të përbashkëta sa i takon tregut të përbashkët rajonal dhe energjisë. Në Britaninë e Madhe pritet që të mos mungojnë diskutimet sa i takon emigracionit të paligjshëm dhe luftës kundër krimit të organizuar dhe korrupsionit. Jeton Zulfaj, këshilltar i kryeministrit në detyrë, Albin Kurti thotë se në Londër, Kosova do të adresojë moszbatimin e marrëveshjes për arsimin e lartë nga Serbia.