Votat preferenciale sollën ndryshime të konsiderueshme në listat fituese të kandidatëve për deputet për subjektet politike në vend. Në qarkun e Tiranës, Partia Socialiste fitoi 18 mandate. Sipas kodit zgjedhor të gjithë kandidatët, të cilët ishin renditur larg 18 vendeve të para të Partisë Socialiste duhet të thyenin herësin për t’u përfshirë në listë fituese. Pas përfundimit të numërimit të votave preferenciale, janë dy socialistë, të cilët kanë mundur të fitojnë më shumë se 10 mijë vota dhe të fitojnë mandatin e deputetit, Fatmir Xhafaj dhe Ornaldo Rakipi. Dy kandidatët, të cilët u spostuan nga lista fituese e socialistëve janë Fidel Ylli dhe kryetari i Partisë Socialiste në Tiranë, Ervin Bushati. Lidhur me këtë çështje Bushati është shprehur në një postim në facebook se si kryetar i socialistëve, në këto zgjedhje kishte përgjegjësi për të gjithë përfaqësuesit e kësaj partie dhe se arriti t’i siguronte më shumë se 19 mijë vota socialistëve në Tiranë. Ndërkohë 27 vjeçari Ornaldo Rakipi, në postimin e tij në facebook është shprehur se kjo nuk është vetëm fitorja e tij, por fitorja e të gjithëve. Subjekti politik i Partisë Demokratike dhe aleatëve ka fituar 15 mandate në qarkun e Tiranës. Përsa i përket kandidatëve për deputet nuk ka pasur surpriza dhe as deputetë të cilët kanë thyer herësin. Më i votuari i demokratëve në qarkun e tiranës është Lulzim Basha me 16 mijë e 186 vota, për t’u ndjekur nga Agron Shehaj me 13 mijë e 852 vota dhe Belind Këlliçi me 11 mijë e 581vota .