Të paktën tetë palestinezë, shumica e tyre fëmijë, u vranë dhe shumë të tjerë u plagosën në Gazën qendrore ndërsa po mbushnin ujë, të dielën, thanë zyrtarët lokalë, në një sulm izraelit për të cilin ushtria tha se nuk arriti objektivin. Ushtria izraelite tha se raketa kishte për qëllim të godiste një militant të Xhihadit Islamik në zonë, por se një mosfunksionim kishte bërë që ajo të binte "dhjetëra metra larg objektivit". "Ne shprehim keqardhje për çdo dëmtim të civilëve të papërfshirë", tha ushtria në një deklaratë, duke shtuar se incidenti ishte nën shqyrtim. Sulmi goditi një pikë shpërndarjeje të ujit në kampin e refugjatëve Nuseirat, duke vrarë gjashtë fëmijë dhe duke plagosur 17 të tjerë, tha Ahmed Abu Saifan, një mjek urgjence në Spitalin Al-Aëda. Mungesa e ujit në Gaza është përkeqësuar ndjeshëm në javët e fundit, me mungesat e karburantit që kanë cuar në mbylljen e objekteve të desalinizimit dhe kanalizimeve, duke i bërë njerëzit të varur nga qendrat e grumbullimit ku mund të mbushin enët e tyre plastike. Disa orë më vonë, 12 persona u vranë nga një sulm izraelit në një treg në qytetin e Gazës, raportuan mediat palestineze. Ushtria izraelite nuk bëri komente për këtë sulm. Ministria e shëndetësisë e Gazës tha të dielën se më shumë se 58,000 persona janë vrarë që nga fillimi i luftës mes Izraelit dhe Hamasit, me 139 persona të shtuar në bilancin e viktimave vetëm gjatë 24 orëve të fundit. Ministria nuk bën dallim mes civilëve dhe luftëtarëve në bilancin e saj, por thotë se mbi gjysma e të vrarëve janë gra dhe fëmijë.