Kryeministri Edi Rama ka përforcuar mbështetjen e Shqipërisë për sulmin e ndërmarrë nga SHBA dhe Izraeli ndaj Iranit, teksa ka dënuar kundërpërgjigjen e Teheranit ndaj vendeve të tjera të Gjirit Persik, përfshirë këtu edhe Emiratet e Bashkuara Arabe. ‘Sulmet e verbra dhe të dëshpëruara të Republikës Khomeiniste kundër Emirateve të Bashkuara Arabe nuk janë thjesht një sulm ndaj një kombi sovran. Ato janë një sulm ndaj stabilitetit, prosperitetit dhe vetë idesë se Lindja e Mesme mund të përcaktohet nga paqja dhe bashkëpunimi, e jo nga lufta dhe kaosi. Shënjestrimi i një oazi paqësor si Dubai me raketa urrejtjeje dhe shkatërrimi zbulon edhe një herë natyrën e vërtetë të regjimit mesjetar në Teheran. Ky është refleksi i një sistemi të destinuar të dështojë, një sistemi që eksporton dhunë dhe përdor terrorin si armë kundër fqinjëve që kërkojnë paqe, për t’i frikësuar jo vetëm ata, por para së gjithash popullin e vet që kërkon liri’, shkruan Rama përmes një postimi në rrjetet sociale.