Raketat balistike me rreze të shkurtër veprimi të Koresë së Veriut po bëhen më të sakta pas më shumë se një viti të përdorimit të drejtpërdrejtë luftarak të tyre nga Rusia kundër Ukrainës, sipas një raporti të ri. Moska ka përdorur raketat balistike KN-23 dhe KN-24 të prodhuara nga Koreja e Veriut për të sulmuar Ukrainën për më shumë se një vit, të kombinuara zakonisht me raketa të prodhimit vendas të Moskës dhe sulme me dronë. Diktatori i Koresë së Veriut, Kim Jong Un, është bërë një burim kryesor i raketave, artilerisë dhe personelit për përpjekjet luftarake të presidentit rus Vladimir Putin kundër fqinjit të tij, një marrëdhënie që Uashingtoni dhe Seuli po e vëzhgojnë nga afër. "Problemi më i madh me të cilin po përballemi është ai që vjen nga Koreja e Veriut," tha në shtator gjeneral-lejtnanti Kyrylo Budanov, kreu i agjencisë së inteligjencës ushtarake të Ukrainës GUR. Më vonë gjatë vitit, GUR tha se Rusia kishte marrë më shumë se 100 raketa balistike nga Koreja e Veriut. Përdorimi i raketave të Phenianit në luftime i ofroi Koresë së Veriut një shans për të parë se si funksiononte teknologjia e saj në një mjedis lufte dhe mundësinë për të modifikuar dhe përmirësuar armët. Kjo është veçanërisht shqetësuese për Korenë e Jugut, pasi marrëdhëniet midis dy shteteve në gadishullin Korean përkeqësohen. Dy burime të larta ukrainase i thanë ndërkohë agjencisë së lajmeve Reuters të enjten se raketat balistike të Koresë së Veriut të përdorura kundër Ukrainës nga Moska që nga fundi i vitit të kaluar kanë qenë shumë më të sakta se ato të përdorura në sulmet e mëparshme në 2024.