Ushtria amerikane po planifikon të ngrejë një qendër trajnimi në Evropë për t'u mësuar aleatëve të NATO-s se si të përdorin sistemet raketore HIMARS, i tha Zërit të Amerikës një gjeneral i lartë amerikan. Vendimi pason rritjen e kërkesave për këtë sistem në Evropën Lindore dhe përdorimin e sukseshëm të kësaj arme në Ukrainë. “Ne jemi ende në fazat paraprake, por do të ishte një qendër që do shërbente për disa shtete”, i tha Zërit të Amerikës komandanti i Korpusit V gjeneral-lejtnanti John Kolasheski, i cili është përgjegjës për operacionet e ushtrisë amerikane përgjatë krahut lindor të NATO-s. Kjo u bë e ditur pasi Departamenti i Shtetit miratoi të martën shitjen e 18 sistemeve HIMARS për Poloninë, së bashku me qindra sisteme raketash me shumë lëshime dhe dhjetëra sisteme raketore taktike të ushtrisë. Qeveria polake do të paguajë rreth 10 miliardë dollarë për këtë blerje. Sistemet HIMARS që janë miratuar për shitje do t’u ofrohen vendeve të NATO-s si Estonia, Polonia dhe Rumania në krahun lindore të NATO-s. “Ata e shohin brutalitetin e asaj që ka ndodhur në Ukrainë dhe ka një ndjenjë urgjence, të 30-të kombet janë të bashkuar në këtë mbrojtje efektive të territorit të NATO-s”, tha Kolasheski. Ministri estonez i Mbrojtjes Hanno Pevkur tha në anën tjetër se “një nga mësimet më të mëdha të nxjerra” nga lufta në Ukrainë është se “armët me rreze të gjatë veprimi janë jashtëzakonisht të rëndësishme”. Ndryshimi i kursit të luftës në Ukrainë erdhi pikërisht pas dërgimit atje të sistemeve HIMARS.